成日聽見鬧人衣冠禽獸，又有人譏諷其他人係波羅雞（一味靠黐），中大嘅百鳥迎春雞年賀歲展，就為大家解答衣冠禽獸同波羅雞原來都係好東西。
負責策展嘅中大助理研究主任（器物）王冠宇博士話，為迎接雞年，特別喺中大館藏同私人珍藏借來53組同雞有關嘅文物畀市民觀賞。當中有嶺南畫派創始人之一高劍父嘅牡丹雞石圖軸等。
中大文物館展出
王冠宇介紹明代嘅文四品雲雁補子，其實係官服前襟同後背各繡有一塊方形補子，文官繡禽，武官繡獸，延至清代，以示官階。後來民間對官員感到失望，譏諷係衣冠禽獸。至於波羅雞，原為廣州黃埔南海神廟祭祀必備品紙彩雞，始於宋代，清代更成為廟祭後買回家嘅祈福物。所謂波羅雞，即係「波羅鄉人製作的紙彩雞」，用紙品、竹及雞毛貼喺紙彩雞上，後來先變成有貶意嘅「一味靠黐」。展覽中有畫家葉因泉嘅創作版本。展覽即日起至3月5日喺中大中國文化研究所文物館展出，畀大家免費參觀。