中央噚日同步批准政務司司長林鄭月娥同財政司司長曾俊華嘅辭職，新一屆跑馬仔轉入直路。近期建制派收到嘅風聲，都係話中央似乎傾向支持林鄭，無論消息是真是假，都嚇怕唔少建制選委，令佢哋唔敢押注至鬍鬚曾。
據聞喺咁嘅情況下，民主派都想鋤強扶弱，畀提名鬍鬚曾入閘同奶媽決一死戰，但鬍鬚曾都唔係毫無保留照單全收，或者會只收淺黃而拒深黃民主派提名，以免弄巧成拙。
怕建制選委唔埋身
據聞曾營呢排軍心不穩，連150個入閘提名都未夠，或只有60零個工商界嘅提名，因為建制選委唔敢畀提名疑似未獲中央祝福嘅人，以免同西環唱反調而遭殃。
唔夠提名，鬍鬚曾係咪玩完？又未必，因為手握325票嘅民主派，角色好關鍵。雖然民主派至今未有表明撐鬍鬚曾，但係唔少民主派人士私下都表示，屆時如果只有林鄭出戰，都要因應情況畀票鬍鬚曾入閘，力阻林鄭當選，幫手炒熱啲花生吖嘛。
咁民主派有乜嘢下台階，可以華麗轉身撐鬍鬚曾？促競爭、反打壓，仲唔係一大原因？民主派當然鋤強扶弱。有民主派選委更大吐苦水，話唔少市民鬧佢哋點解唔提名鬍鬚曾，似乎鬍鬚曾喺市民心目中都係眾望所歸。
難得獲民主派畀票，曾營係咪要慶祝先？亦未必噃！因為有薯片支持者擔心，民主派嘅提名會係「死亡之吻」，要咗反而令到僅餘嘅建制選委都唔敢埋身。
但另有高人覺得，最現實都係入咗閘先至得，既然西環家陣強烈打壓，梗係嚟個絕地反擊，希望過咗海就係神仙，攞到足夠提名做候選人，先有望喺不記名投票下絕地反擊甚至成功出線。八方聽聞曾營都會考慮提名嘅民主派係深黃定淺黃陣營，如果係深黃，或者會婉拒好意嘞！
李八方
mailto:[email protected]