雖然德甲𠵱家仲歇緊冬，不過拜仁慕尼黑喺上周六就去到杜塞爾多夫出戰德國電訊盃，最終憑列貝利同查維馬天尼斯各建一功，決賽以2:1擊敗緬恩斯，贏得2017年首個冠軍！
上周六舉行電訊盃時因為天氣太凍，球場要閂埋個天幕先可以順利比賽，唔知拜仁班球員係咪凍到對腳都僵晒，佢哋喺四強對東道主杜塞爾多夫時，喺法定時間45分鐘內悶和0:0，要靠射12碼贏4:1晉級決賽。
提早打包賀芬咸孖寶
去到決賽拜仁當堂唔同晒，佢哋喺開波三分鐘就有列貝利先開紀錄，雖然緬恩斯喺七分鐘有安達拉馬路喺禁區外勁射破網幫球隊扳平，但係馬天尼斯喺10分鐘就憑住一記頭槌入波，幫拜仁以2:1擊敗緬恩斯，贏得新一年嘅首個冠軍。入波功臣列貝利喺賽後好興奮咁話：「贏波係開心嘅事，但成班隊友都踢出好表現就更重要。」拜仁繼2013同14年再次奪冠，順利壓過另一德甲球隊漢堡成為贏得電訊盃最多嘅球隊。
拜仁喺周五重開嘅德甲作客弗賴堡，今次捧盃應該會令呢支德甲班霸喺聯賽嘅爭標路上更有信心；拜仁暫以39分排榜首，領先第二嘅RB萊比錫三分。另外拜仁喺周日宣佈簽入賀芬咸嘅施巴斯坦魯迪同歷卡斯蘇尼，前者簽約三年，後者就簽五年，兩人將於七日一日正式加盟。