中外唔少政經界名人出去演講都會收取豐厚酬金，學者亦唔例外，好似星級學者郎咸平，市場盛傳佢嘅講座出場費高達60萬人仔，果然夠晒星級。但據聞，佢今晚為「創仔」家夢控股（8101）一個活動做演講嘉賓，只係收「友情價」，事關雙方之後可能仲有合作空間喎。
齋聽個名，大概估到家夢係做寢具生意嘅，不過近年做多幾瓣，包括新成立一間叫做「新新傳媒」嘅公司，培養同發掘網紅，仲會提供埋製作團隊。新新傳媒今晚舉行成立儀式，就請到郎咸平做嘉賓，講網紅嘅經濟前景、新經濟商機之類。
郎咸平生於台灣，1994年來港任教中文大學，2001年轉戰大陸，曾大力抨擊國企改革，指會造成國有資產流失，從此走紅，成為星級學者。呢位學者可能見到創仔近年成日爆炒，忍唔住都要來研究研究吧。