【本報訊】農曆新年前，是錦祥記最忙的日子，這裏，是香港最大的臘腸工場。「呢行忙半年閒半年，未來半年食粥食飯，就睇呢幾個月」。材哥余錦材，是錦祥記的第二代，退休回工場幫手，大哥余錦華主外，他主內。手作切肉腸，灌腸打針放氣，朝五晚五做足七日，至年三十才收爐。「以前呢度十幾個師傅，𠵱家最老嗰個八十幾歲，做埋我哋呢代，要入博物館嘞」。可幸兄弟同心，矢志戰至最後。
記者︰呂麗嬋
工場位於西環干諾道中的工廈，樓下遍佈海味舖，辦年貨熱點。「以前呢幢大廈九成舖做臘腸，𠵱家執剩我同另外一間」。忙了一朝，難得坐低扒了一口飯的華哥說。現時全港只餘五間本地臘腸工場，數錦祥記規模最大，但工場其實亦只有六個人，且都七老八十。「我五十幾，已經係最後生嗰個」。材哥所言，確又無錯，年紀最大是83歲的壯叔李壯，對下是72歲的德師傅。
不過老還老，個個聲如洪鐘，工場地下濕潺潺，人人腳踏水鞋健步如飛，反倒記者步步為營。其中最老師傅壯叔更人如其名，採訪當日15℃，這個戰前老人赤膊上陣，坐在生產線另一邊的材哥，見記者嘖嘖稱奇，講了個冷笑話：「唔好話啲後生唔敬老，阿壯送貨去中環，推住架車仔，次次都有人搶住話要幫手，我問佢：你老實講，有冇人塞一百幾十叫你唔好做先？」
幾個麻甩佬，你一言我一語，就連內斂的壯叔，聞言亦偷偷笑，笑謂不怕冷，只怕無得做：「以前走難落嚟，做嘢為生存，辛苦命」。家住華富邨，仔大女大，生活無憂，但他謂期待有工開的日子，忙半年，見見新會同鄉老朋友，翌年農曆五月又埋班。
抗黑心食物 夕陽行業逢春
60、70年代，製作臘味行業最蓬勃，單西環一帶就有幾十間工場。臘腸好送飯，早年小家庭無雪櫃，一孖膶腸，耐放又惹味，過年必備。及至80年代內地改革開放，平價貨湧港，本土工場被打殘，要不就北移求存。「以前最緊要夠平，係近年關注黑心食品，我哋先叫有啲生存空間」。爸爸一代做批發，供貨給名食肆及海味舖，隱姓埋名為各大品牌生產，貼上別家標籤。習慣為他人作嫁衣裳，轉捩點是新加坡電視台越洋訪問，老字號工場曝光，加上近年勁吹本土熱，乏人問津的夕陽行業，忽然受注目。
對於這個遲來的春天，華哥慨嘆太遲。「𠵱家叫做有啲人識，喺工場都會直銷吓自己品牌嘅臘腸，但佔生意嘅比例唔多」。為圓心願，年前他把心一橫，和朋友合資在花園街街市投得檔口，出售自家品牌，可惜最後還是敵不過貴租，悉數頂手給朋友，膠袋上印的門市，再無股份。「叫做還咗少少心願，已經無憾」。他說：「以前見到人哋一轉手賣高一兩倍，梗有啲心理唔平衡，但做埋零售，又要租舖又要宣傳，我都60幾，啲師傅最老嗰個都80幾，我請佢真係試過俾人鬧，話我虐老！」
由西源里、石塘嘴到現在的西環干諾道西；由無牌到有牌，子承父業，默默經營：「幾次想執咗去，但又唔捨得」。長達十年，淡季時揸小巴幫補生計。「做廚房、喺街市劏雞，咩都做過，以前會諗，人做生意我做生意，點解我做到隻狗咁，樓都賺唔到一層」。年前終於捱出抑鬱症，需長期服藥。「好大壓力，好在我鍾意小動物，養吓魚減壓」。辦公室連工場共有五個大魚缸，又有一隻很親人的異國短毛貓「肥仔」，儼如動物園。
「佢好多粉絲，成日有人送啲毛巾罐頭上嚟」。總是眉頭緊皺的華哥，說起肥仔始露歡顏。畢竟夕陽行業，連心態都近黃昏。「好彩細佬退休返嚟幫手，佢知道工場點運作，幫輕唔少。講真，呢行冇錢賺又辛苦，都係做埋我哋呢代，𠵱家話剩4、5間工場，有啲一個人做，70幾歲整咗擺門口賣，到呢度幾個師傅都走埋，就拉閘㗎嘞」。華哥說。
