嗰頭講緊雷神今日開局不順，跑完頭三場只得一席亞軍，呢頭佢立即於第四場四班1600米贏出方嘉柏馬房大熱門「綽綽有餘」，既幫自己打開全日勝門，亦為座騎補中開齋，單Win及組合獨贏A1分別派30及15.5元。而方嘉柏連同第二場由田泰安贏「光速銀桂」，於新一年首度起孖，
雷神贏出今場後，個人長勝紀錄改寫至連贏32次賽事未斷纜。講番大熱門「綽綽有餘」，上次配潘頓跑五班1600米，結果影相不敵老馬「常妙星」做阿二，今勻由雷神接手跑高一班，7檔出閘一刻好趣怪，趴低身撞開閘廂，比其他馬略為先了半拍開閘，有啲偷步之嫌，不過牠躍出後外斜撞向8檔之「常妙星」，有少少失位，所以整體上冇佔到優勢，但好快已經穩定走勢。
「綽綽有餘」之後沿途留住跑，直路從中叠一鼓作氣殺上，末段雖受第三熱「王者再現」及次熱「美麗寶寶」嚴重威脅，食正三文治，但最終都能率先過終點，頸位險勝亞軍「王者再現」開齋。計埋「綽綽有餘」在內，雷神近四次為方嘉柏上仗由其他騎師壓陣的二奶馬策騎出賽，全部順利取勝而回，佢堪稱係方廐補中王。
第四場二至四名分別為「王者再現」、「美麗寶寶」及「奔馳寶馬」，四重彩派3,311元。