綽號「猛人輝」的英國前冠軍騎師蘇兆輝，上季在港客串屆滿嗰陣，曾說過佢最難忘嘅一匹頭馬係「嘉應之友」，因為隻馬被「喜蓮獎星」同「天才」力逼下，仍然臨危不亂，贏出精彩一仗。
「嘉應之友」出戰今日（14日）第十場二班1400米，不過就係梁家俊騎。而第七場三班草地1200米，蘇兆輝隻蔡約翰馬房座騎「乘勢好運」都有個小故事。
「乘勢好運」服役首場頭馬就係由蘇兆輝贏得，嗰場亦係佢首度為蔡神仙效力，結果騎練合作一擊即中。猛人輝話未合作之前，喺晨課見到蔡約翰，成日戴住頂鴨嘴帽，又比較沉默寡言，即使開口講嘢，聲線都較為低沉。
猛人輝直言最初同神仙溝通都有啲緊張，不過自「乘勢好運」贏馬後，就好似將冰山劈開。猛人輝爆出一個小秘密，佢話蔡神仙家陣喺晨課有時會突如其來，講吓啲冷笑話，氣氛即時輕鬆好多。
「乘勢好運」今季只一戰，季初9月谷草1200米跑入殿軍後，10月曾停課兩星期，但復課後操練冇間斷，3次試閘都有唔錯走勢，最近一課大閘喺雷神胯下跑第2，雖然雷神今場騎揀「勁飛勁」，但雷神同「乘勢好運」唔算夾，合作3次只得2季1殿。反應猛人輝騎「乘勢好運」1次即勝，今次人馬重逢加上抽到1檔，贏馬一啲都唔奇。