李家鼎與郭羨妮昨日在觀塘apm出席活動，二人在台上示範煮3道餸，鼎爺要煮茄汁蝦、黃酒煮雞及撈起，現場有不少粉絲圍觀，他的細仔李泳豪在台下充當攝影師幫爸爸影相。
由於商場限制只可以用電磁爐，不能用明火煮食，鼎爺不時呻不夠火力及溫度，問到是否有難度？他笑言：「電爐得200幾度，驚出到嚟啲人以為我唔得，交代唔到，係明火問題，下次有騷都係切吓嘢算，唔搞掂明火，我做得唔開心。」
懶理女友詐型
近期人氣紅爆的鼎爺透露農曆新年要開工，連陪孫仔時間都冇。問到節目是否添食？鼎爺表示未收到通知及等安排，記者笑言他要開工冇時間陪女友，他表示：「𠵱家都幾十歲，又唔係10幾歲，得閒就碰吓頭，明知做嘢正正當當，點會詐型，如果詐型就返屋企唞。」問到會否在雞年與女友拉埋天窗，鼎爺即講爛gag：「𠵱家香港仲有天窗啲屋，結婚嘅嘢順其自然，𠵱家係要做嘢買間靚啲屋。」
郭羨妮恨生仔
另外，郭羨妮就希望連生貴子，她說：「本來新一年工作已計劃好，同老公傾完就覺得趁後生，希望今年可以成事。」郭羨妮更笑言已問過囡囡，她說：「以前佢話好，𠵱家就話唔好，驚有人搶佢張凳，小朋友係咁，到時先算，所以今年主力調理身體，同埋都有個女，想要個仔，如果唔係都冇所謂，都係自己親生。」
採訪、攝影：曹家誠