雷神莫雷拉第九場策「哈蝦巴爸」跑第二後，騎師王升到52分，拋離最接近的田泰安16分，後者數字上已冇可能平反敗局，雷神篤定新一年首度封王。
不過，雷神冇就此收手，更何況尾場第十場二班1400米，佢係揀騎大摩馬房「無敵飛龍」，而放手由自己贏開的蔡約翰馬房超新星「劍斷浪」，冇理由老貓燒鬚。
結果雷神真係嚟個錦上添花，「無敵飛龍」上次巴度慢閘追返嚟都第二，呢鋪換上雷神，出閘暢順自然，末段擺正軚於外叠全力衝刺，短馬頭位氣走「旌暉」獲勝，單Win及組合獨贏A1分別派22及16元。雷神就此全日憑「綽綽有餘」、「慣勝聆聽」、「爭分奪秒」及「無敵飛龍」四喜臨門，以64分在新一年首勝騎師王。
至於人不在港、身在澳洲黃金海岸買馬的大摩，遙控軍情之下，整日有「銀城福星」、「喜旺寶」及「無敵飛龍」中三元，以31Win壓過蘇偉賢殺上龍虎榜第二位，直追多佢兩Win領先的蔡約翰。
尾場「旌暉」力拼飲恨做二奶，三連勝後斷纜季內首逢敗績，三、四名則由一對冷馬「一片光明」及「辣得很」順序瓜分，四重彩派一萬四千幾。
「劍斷浪」雷神唔騎換柏寶，沿途本來守好位，跑來相安無事，直路中段卻突然墮退，睇住柏寶將佢收慢過終點，馬兒似有問題，結果負9.25馬位跑第13名尾二。