09年挾住國際中華小姐冠軍來港發展嘅苟芸慧，入行多年，直到目前為止，佢都只係承認過同香港先生羅天宇拍過拖，但佢嘅緋聞男友層面就好多元化喇，上至天王、下至賽車手都有。
去年苟姑娘就同賽車手兼公和建築創辦人陸孝佩個仔、亦係馬來西亞錫礦大王陸佑後人嘅陸漢洋（前名陸恭和）傳緋聞。
除咗陸漢洋，最經典當然係同天王郭富城嘅緋聞，有傳佢哋13年合作拍攝廣告時撻着，當時就話苟姑娘介入咗城城同熊黛林(Lynn)嘅戀情。
苟姑娘除咗有傳曾介入城城同Lynn嘅戀情，去年8月亦曾傳出佢介入好姊妹朱璇同湯臣集團副主席湯珈鋮嘅戀情。此外，亦有指苟姑娘撻着前經濟發展及勞工局局長葉澍堃嘅細仔葉瀚華，葉瀚華仲大讚苟姑娘份人好玩。