「愛港力」代表人物陳淨心曾經喺微博狙擊張敬軒參加湖南衛視《我是歌手4》，指軒仔出力反國民教育兼支持佔中，傳軒仔前年被退出比賽，但當時英皇高層霍汶希指公司曾探討軒仔參賽事宜，仍未決定，所以唔存在退出問題。
一年過去，軒仔終於成功入閘，參加新一季《我是歌手5》（現改名《歌手》），並已錄影第一集；但昨日突然有內地網民爆料軒仔再一次被踢出局，連英皇廣州總經理周峰剛剛都喺微博留言暗示﹕「沒有難過，只有憤怒！」
其實睇番陳淨心最近嘅微博又確實出咗唔少力，去年底開始，軒仔未正式宣佈參與《歌手》時，淨心BB已經開post不停鬧爆軒仔，未夠一個月已先後開咗7個post，其中一個鬧﹕「廣州人張敬軒是反骨仔，忘恩負義！拿了香港身份搞亂香港，煽動兩地分化矛盾，如果你能回內地賺人民幣，簡直天理難容！不愛國家不愛民族只愛人民幣是不可能的！國家面前無偶像！」
不過都有好多軒仔嘅fans留言反擊陳淨心，搞到陳淨心都忍唔住要爆seed：「向祖國感恩有問題嗎？張敬軒的言論都在諷刺蔣麗雲議員的，難道張敬軒你可以選擇喝英國水長大的嗎？粉絲不用天天為你偶像洗地了。」