前晚林鄭宣佈辭職後，一向鍾意食花生嘅自由黨榮譽主席田北俊深夜喺facebook出post，上載一幅有曾俊華同林鄭兩位司長嘅改圖，引用張學友同湯寶如20幾年前經典合唱歌《相思風雨中》，玩食字變為《雙司風雨中》，留言問網友「知唔知《相思風雨中》第一句係乜？」《相思風雨中》首句歌詞係「難解百般愁相知愛意濃」，莫非係田少表達曾俊華遇勁敵林鄭嘅擔憂？
田少噚日喺自己個商台早晨節目開咪解畫之餘，仲好好唱口，即席高唱網民喺佢fb留言改編呢首歌嘅歌詞：「難解百般愁，CY醋味濃，胡官看機緣，酸劉遇冷風，司長各天涯，Carrie可會相逢，Chips叔叔等批輕鬆度假中……」
田少又話，有傳中央下周初同日批林鄭同曾俊華辭職，話對於等咗一個月嘅財爺好似唔係太公道，但亦話中央同日畀兩個司長一齊出閘，唔理邊隻馬操咗幾耐，都算公平嘅。真命天子可能要3月先知，因為兩個司長一樣都咁有實力，不過認為如果選委信晒中聯辦講，林鄭就會多啲着數。