上星期主持立法會財委會時，疑似向議員朱凱廸爆粗嘅財委會主席陳健波，噚日再同朱凱廸喺議會狹路相逢，但今次唔係為嗌交，而係為食蛋糕。話說噚日財委會討論下屆司局長應否加人工，到場回應質詢嘅局長譚志源話要喺中場休會時請議員食「cheap餅」，陳健波就休會時就話想睇吓啲餅有幾cheap，睇完就話：「普通啦，都唔係太cheap。」但笑言由於政治原因，「我梗係唔會食啦」。
行過立法會走廊嘅朱凱廸見到，亦伸個頭望望啲餅，上次「挑逗」朱凱廸嘅陳健波就笑笑口話「食餅啦，等你選票即刻跌咗一萬票」，朱凱廸聽到即時掉頭走，話「唔好嘞、唔好嘞」就走人。民記議員何俊賢、陳克勤、周浩鼎等人，就唔理陳健波「詛咒」，全部都趁休會食餅醫肚。