支聯會個六四紀念館舊年關門之後，支記到𠵱家都未籌夠錢買新館址，不過大家放心，支聯會已搵到地方喺今年六四前搞臨時紀念館，而今年維園年宵亦會用六四紀念館做主題，秘書李卓人同八方講，𠵱家仲差逾200萬先夠錢買新館永久館址，希望年宵可以籌多啲錢幫補。
阿人話已經係石硤尾賽馬會創意藝術中心搵到地方，4月底會舉辦臨時六四紀念館，預計會搞兩個月左右，至於原本紀念館舊單位已經賣咗，叫做收返本金，賺咗兩年唔使畀租。𠵱家要成300萬買新館址，但只籌到70萬左右，所以今年支記年宵會再籌錢，希望最少將筆錢增加到200萬左右，可以睇住樓先。
今年支聯會年宵攤位亦會用六四紀念館做主題，佈置到好似迷你六四紀念館咁，現場仲會有六四照片嘅菲林底片，市民安裝一個手機app拍攝底片，就可變成相片存入手機。另外亦會出售一隻六四紀念館導賞USB手指，入面有舊紀念館照片同資料，只要插入電腦就可重現六四紀念館，喺虛擬世界再參觀。