周末冇節目，八方有好介紹，職工盟今日起一連兩日上午11點至下午5點，喺彌敦道208號四海大廈1樓02-03室舉辦「接義連衫——二手靚衫義賣活動」。活動由職工盟3個空中服務員工會牽頭，空姐空少共捐出約500件衫，大部份38蚊起，職工盟主席吳敏兒（Carol）就捐咗3件喺印度新德里買嘅羊毛披肩，天氣凍凍哋最啱。
秘書長李卓人同公民黨譚文豪（Jeremy）都有割愛。阿人捐出嘅衞衣，過去十幾年陪佢走過大大小小抗爭，包括2003年7.1遊行同2014年雨傘運動等，衫上面嗰句Never Surrender代表佢為公義、為民主嘅決心，名副其實係件永不放棄嘅戰衣。至於本身係機師嘅Jeremy就送上美國空軍指定嘅風褸，呢件飛機師風衣睇落幾型仔㗎，兩件衫同樣賣388蚊。Carol話活動仲設抽獎環節，送出化妝品或護膚品，收益會撥捐職工盟作勞工服務及推廣之用，又可買靚衫，又可做善事，一舉兩得。