有奶媽之稱嘅政務司司長林鄭月娥，前日喺政府閉門研討會上，自爆參選特首係受上帝感召，唔少網民都忍唔住惡搞佢，紛紛用自己方法搵「上帝」問清楚。奶媽呢句話唔止打攪到上帝，仲連政制及內地事務局局長譚志源都受影響，唔再敢亂講受感召去做問責官。
梁天琦：上帝叫我守行為
網民前日開始喺社交網大規模洗版搵上帝，有網民上載美劇情節，問林鄭「到底上帝的聲線如何？上帝的原話是怎樣？用甚麼語言？是否幻聽？」亦有網民即時喺facebook留言問上帝（個惡搞專頁）有冇叫過林鄭參選特首，並獲上帝賜覆稱「沒」。
除咗網民，政界不論左膠、本土派定傘兵，都忍唔住就林鄭嘅「神話」抽水。社民連主席吳文遠前晚就發起「一人一句上帝叫」行動；噚日了結同《大公報》記者打交案嘅本土民主前線梁天琦，亦喺facebook搞笑話「上帝叫我守行為」，並感謝上帝同多位幫佢手嘅法律界朋友。
區選硬撼過建制嘅傘兵葉錦龍，就話要認真同林鄭討論選舉條例，話林鄭聲稱上帝支持佢參選，咁佢點先可以上到天堂，叫上帝簽番份支持同意書？更有網民話上帝叫林鄭選特首，中國外交部會唔會出聲明，批評外國嘅上帝干預香港內部事務？
除咗民主派，一向出名係虔誠基督徒嘅政制及內地事務局局長譚志源，噚日喺立法會財委會講到自己由公務員轉做問責官經驗時，話當年除咗「林公公」林瑞麟邀請佢轉工，亦有啲敏感到佢唔敢亂講嘅感召，但「至於邊個感召我唔講」喎。
李八方
mailto:[email protected]