近年內地為咗搶收視，不惜用銀彈政策去招攬巨星拍真人騷，好似大美人林青霞、黎明、郭富城、劉嘉玲同趙雅芝等等。
不過昨日有周刊報道，就算銀彈政策點咁吸引，亦唔係個個都有興趣，呢個係邊個？之唔係梁朝偉囉！
事緣近期偉仔為《擺渡人》喺內地做宣傳，因為佢喺戲中嘅角色好新鮮，於是有唔少內地電視台對佢好有興趣，加上佢又好少亮相綜藝節目，結果開價兩億人民幣仔，希望可以打動偉仔答允演出。
報道仲話有知情人士話一向我行我素嘅偉仔，雖然有同老婆劉嘉玲講過呢件事，但係講完得出嘅結論都係唔做，而且佢本身都唔想喺鏡頭前挑戰高難度任務，況且今年啲工作排得好密，所以最後都推咗！而偉仔嘅經理人公司事後接受周刊訪問，佢哋話確實係有搵過偉仔做真人騷，但係今年啲工作已經安排好，主要係拍戲為主，所以冇期接！