仲有唔夠半個月就到大年初一，八方本來想話夜觀星象，睇吓流年運程，點知呢排香港一片霧霾睇唔到星，都係要靠城中最有名望嘅堪輿大師蔡伯勵幫手。蔡老師話：「雞年整體嚟講唔多好，做生意嘅要守，巿民節衣縮食，政府就唔好好大喜功樣樣都要搞，最後只會一事無成，應該要穩中求勝。」
蔡伯勵：兔年運程最差
提到全城關注嘅特首跑馬仔，蔡老師話，3月份嘅選舉月競爭異常激烈，局面混亂，動盪不安，佢勉勵當選者話：「巿民好簡單，只求安居樂業，治安好；新官上場，只要推行政策得民心，唔好擾民，就會有人支持。」
至於鹿死誰手？蔡老師冇直接評論，只係話十二生肖中，來年運程最差就係兔年，犯太歲又冇吉星照住，係犯破之年。咁講唔通即係要勸退屬兔嘅薯片叔叔？
咁屬雞嘅林鄭呢？蔡老師話，肖雞雖有凶星太歲，但只係本命年，並非犯太歲，反而有吉星文昌。
佢提醒肖雞者「過剛易折，和氣致祥」，唔知上帝有冇提醒呢位鐵娘子化戾氣為祥和呢？