每逢新正頭，都係親朋戚友四方枱上雀戰嘅大好時機，邊打邊睇《嚦咕嚦咕新年財》就夠晒應節。
咪睇少麻雀呢樣咁受港人歡迎嘅消遣活動，麻雀牌嘅製作技藝，其實被列入香港非物質文化遺產，豈止賭博咁簡單，朗豪坊就趁住農曆新年，推廣呢種咁具香港特色嘅聯誼娛樂，將商場中庭變身老少咸宜、以麻雀為主題嘅遊戲競技場－「喜雀遊樂園」！
呢個雞年最合家歡嘅麻雀嘉年華，會設置多個巨型麻雀拍照場景，雀精見到一定爆like。
同場仲有加入互動元素嘅攤位遊戲，例如麻雀版嘅拋彩虹「比翼雙飛」等，畀大家自我挑戰一番。朗豪坊仲特別製作一副「喜雀耍樂13么擦膠」同「麻雀」主題利是封，畀消費滿一定數額客人換領。