內地霧霾近日再襲港，網上早前更瘋傳一張高鐵「和諧號」車頭疑被熏黑嘅相，聲稱本月初一列抵達北京南站嘅高鐵，車身因為同空氣磨擦產生靜電，黏上空氣中高濃度嘅PM2.5，令車身變黑，但有本港物理學者質疑呢個說法。
中大物理系高級講師、物理學博士湯兆昇話，車身上嘅黑色物質似係污迹，「即使同污染空氣有關，都唔係所謂PM2.5，因PM2.5非常微小，唔可能咁樣睇到」。佢又話，高鐵車身產生靜電並非不可能，但呢種大型裝置應有除靜電機制。
科學專欄作家、物理學博士余海峯亦話，磨擦係產生靜電嘅基本原理，故快速行駛嘅列車，車身會同空氣磨擦而產生靜電，正如汽車行駛時，車身會產生靜電一樣，所以汽車會有接地線。至於列車有冇安裝排除靜電嘅裝置，就要向相關專業嘅工程人員查詢。