公民黨黨魁楊岳橋（AY）兩星期前求婚成功，會同傳說中嘅女友陳小姐拉埋天窗。八方前日賣大包，登咗AY同陳小姐sweet爆嘅合照，陳志雲都唔執輸，噚日喺facebook上載一段AY同陳小姐去舞台劇探班嘅片段，大家可見未來楊太係幾咁sweet。而曾經同AY譜出「娥頸橋之戀」嘅另一位「陳小姐」陳玉娥，都好關心呢場戀事，佢接受傳媒訪問時仲溫馨提示AY，結婚要深思熟慮喎。
女友入鏡AY慌張
其實陳小姐一直冇亮相，皆因兩人拍拖好低調，短片可見志雲大師試圖拉AY女友入鏡，問道：「呢個係你女朋友，橫掂都嚟咗，見吓嘛！」一向冷靜嘅AY當堂神色慌張話：「呢啲唔好上鏡啦！」但志雲大師一於少理，仲追問：「係咪話就嚟結婚？」當時未求婚嘅AY就話「係計劃之中嘅」，旁邊已經被拉入鏡嘅陳小姐即時甜笑但依舊好怕醜。
志雲大師又問陳小姐會唔會擔心AY多女粉絲，又追問究竟求咗婚未？AY即搭嘴話「to 求 or not to 求, that's the question」，陳小姐笑住稱：「我唔知算唔算喎，見到實物先算。」而志雲發現陳小姐真係無戴戒指，呢鋪輪到陳小姐反擊：「我未應承㗎嘛！」但故事結局大家都知道係大團圓。
唔少女粉絲聽到男神結婚，新娘不是我都傷心鳥，而陳玉娥接受《經濟日報》TOPick訪問時就三度強調「唔係講緊我」，繼而指得悉AY有女朋友後，一直想溫馨提示，結婚應該深思熟慮，話驚AY會受傷，似乎佢都係一把癡心情長劍！
李八方
mailto:[email protected]