金融發展局換屆，噚日公佈有13名新成員，新人當中有德勤中國審計合夥人、會計師公會副會長唐業銓（Eric）。會計界對於Eric應該唔會陌生，而花生友最有印象，就應該係4年幾前，佢曾經同前港姐葉翠翠喺金鐘飯聚。
講開又講，今次加入金發局政策研究小組，召集人李律仁大狀都係呢期紅人，盛傳佢幫林鄭助選，可能好快有公佈。其餘金發局新成員有資深賓架陳鳳翔、內地著名私募基金紅杉資本創始人沈南鵬、畢馬威韋安祖、中央紗廠太子爺吳柏年等。
金發局係CY屬意成立，喺新舊政府交接期間，主席史美倫（查太）被人問到金發局存續問題，如果林鄭順利入閘，應該就唔使問喇。