皇家馬德里中場占士洛迪古斯唔受主帥施丹重用，一直都想走人，唔少歐洲大球會都想請佢過檔，好似車路士就盛意拳拳，開到7,800萬鎊（約7.4億港元）轉會費，令皇馬同J.Rod都心動！不過，基斯坦奴朗拿度同呢位哥倫比亞中場好老友，唔想佢離隊，仲親自說服對方留低。據英國《太陽報》披露，J.Rod聽C朗話，拒絕咗車仔邀請。另外，最近獲選世界足球先生嘅C朗，日前被列入勞倫斯世界體育獎嘅最佳男運動員最後六強，對手有田徑嘅保特同法拉、籃球嘅史堤芬居里同勒邦占士、網球嘅梅禮。皇馬舊年拎咗歐聯，就同歐國盃盟主葡萄牙一齊候選最佳隊伍。至於英超冠軍李斯特城就候選最佳突破獎，對手有拎完F1總冠軍就退休嘅羅斯保。