雖然立法會補選最快可能暑假先舉行，但各陣營已經虎視眈眈，有非民建聯嘅建制黨派近日留意到民記想派人出戰九西補選，仲打埋開口牌話係區議員葉傲冬同鄭泳舜二選一，唔少建制派憤言唔會畀民記第二梯隊出戰，指論資排輩，寧願支持「23萬監察」嘅金鉸剪王國興（圖）再披甲。
何解唔想民記出戰？據知因為呢次補選同上次新東唔同，上次新東周浩鼎選完唔會留區繼續搶票，但今次民記兩位仁兄，好大可能喺2020年嘅立法會選舉繼續出戰，到時啲票一去不回，咁咪令民記喺九西有兩席？所以建制派計過度過，覺得唔可以畀民記新人上位。
佢哋話去年立法會選舉，民記一啲都唔相讓，搞到王國興壯烈犧牲，加上工聯會一直想喺九西插旗，為咗唔畀民記九西有兩席獨大，寧願翻叮王國興，而如果要培育新人，梁美芬嘅西九新動力都有人等緊上位，點解要益民記新仔？