被傳為特首黑馬人選的馬時亨（圖）昨日以港鐵主席身份與傳媒聚會。佢多次被問到會否去馬，又或會唔會喺新政府中出任財爺等職位，佢一律笑稱「唔會跑㗎啦，慢慢行」，佢喺致辭時更強調「2017年身份不會轉變」。笑住話上年自己身份已轉變咗，喜得兩名外孫榮升公公，更揶揄前同僚林瑞麟「我𠵱家就真係公公」。
肥馬喺台下同傳媒傾偈，亦被問到林鄭辭任嘅看法，「佢係一隻胭脂馬，好搶眼一馬當先」。佢話以胭脂馬形容絕非貶意，只因林鄭係女將。佢又話，上星期同梁振英見面，梁讚鐵路當年係由英國帶到香港，現時港鐵已發展到管理英國鐵路項目，係相當重要嘅發展。港鐵行政總裁梁國權就話上年港鐵列車準時率再創新高，沙中綫工程截至上年年底完成咗68%，高鐵工程至舊年底已完成約85%。