下周日就係英超雙紅會，曼聯同利物浦喺今個周中分別出戰英聯盃四強首回合，紅魔周二率先贏咗侯城，但紅軍就失威喇，周三作客以0:1不敵修咸頓；如果唔係啱啱識到新女友嘅靚仔門將卡利奧斯大勇，話唔定利物浦仲要輸多幾球，次回合肯定翻身無望。
撻着20歲索爆健身KOL
早排卡利奧斯慌失失，搞到正選門將個位都冇埋，可能因為佢前排同22歲模特兒女友Annelie Alpert散咗，影響心情啦。不過，英國《每日鏡報》披露，23歲嘅卡利奧斯已經再次搵到愛情滋潤，同20歲嘅德國健身界KOL Pamela Reif撻着；佢兩個嘅朋友話，佢哋開始咗冇耐，應該仲喺熱戀階段。Pamela Reif係德國其中一位最具影響力嘅網絡紅人，淨係instagram都有270萬個followers。
卡利奧斯人逢喜事精神爽，表現亦返晒嚟！喺周三場波，領隊高路普畀佢打番正選，19分鐘對手列特文同賴恩貝特蘭先後攻門，都被卡利奧斯救到。雖然列特文喺20分鐘終於射入，幫修咸頓領先1:0，但喺43分鐘列特文無人看管下喺禁區勁射，卡利奧斯反應快救出。
高帥用貓紙仍輸0:1
高路普都大讚加埋救咗五球波嘅卡利奧斯，「唔係佢我哋可能輸0:3或0:4，到時次回合就難追嘞！全靠佢，我哋先仲有機會晉級。」
換邊後，高路普換入傷癒嘅菲臘比古天奴，諗住變陣踢3-5-2，畀咗張紙仔史杜列治。高路普話：「我畀嗰陣太遲喇。七至八名球員當時即刻知道要變陣，但羅拔圖法明奴就遲咗啲先知。」可能因為咁，最後利物浦都輸0:1。
至於雙紅會另一主角曼聯亦有新聞，曼聯會啟用費蘭尼份約入面嘅條款，同佢續約至2018年夏天。另外，保羅普巴禮拜三晚同朋友出街食飯，曼聯legging襯NBA球隊火箭嘅波褲，好唔好睇就見仁見智嘞。