巴塞隆拿名宿「細哨」朗拿甸奴，日前公開咗一封寫畀自己八歲時候嘅信，內容除咗回顧自己咁多年嚟嘅足球之路，亦都寄語後輩美斯：唔使理咁多，繼續隨心所欲去踢波。
近期對美斯嚟講可能會幾冇癮，喺歐洲金球獎同世界足球先生選舉都輸畀宿敵基斯坦奴朗拿度，而且巴塞喺歇冬後戰績又麻麻地。喺細哨嗰封給自己的信度，唔少篇幅都係同美斯有關；當時佢效力巴塞如日中天，已經聽過仲喺青年軍嘅美斯有幾勁，深信與眾不同嘅美斯終有一日會成為比傳奇球員更偉大嘅球星。細哨亦向美斯畀啲意見：「要抱住幸福感覺去踢波，自由自在享受足球，專心踢好波。」
巴塞西盃反勝畢爾包
巴塞周三西盃16強次回合主場以3:1贏畢爾包，尼馬打破1,038分鐘入球荒，兩回合計反勝4:3晉級。美斯亦喺歇冬後連續三場比賽，都為巴塞射入罰球建功，正正就係朗拿甸奴想佢做到嘅事情，做好自己踢好波。不過巴塞行政總監格拉奧就唔睇好美斯留隊：「我哋想世界最佳嘅球員留低，但唔會不惜一切。」據報美斯要求加薪兩倍至周薪82.5萬鎊（約786萬港元）。
