非國盃嚟緊周末就開始，相信最多香港球迷關心嘅係，呢個盃賽搞到自己愛隊冇咗邊個球員，例如利物浦冇咗沙迪奧文尼，曼聯冇咗艾歷拜利，曼城又冇咗耶耶托尼……咪住，耶耶今屆冇份踢喎，咁「大象」科特迪瓦中場有乜人用？
家陣科特迪瓦中場都出咗班後起之秀，小弟上星期介紹阿特蘭大嗰陣，提過有位20歲小將叫基斯爾，仲話佢踢法似耶耶托尼。佢都有入選今屆科特迪瓦嘅大軍，教練杜素亞都好重用基斯爾，搵佢踢最擅長、偏進攻嘅中場中，可以等佢將最多嘅精力放喺進攻上面。如果基斯爾喺分組賽踢得好的話，話唔定踢完非國盃後唔係飛返阿特蘭大，而係去其他大球會報到。
除咗基斯爾，科特迪瓦中場仲有兩位值得留意嘅年輕人，分別係梅斯嘅杜古尼同埋尼斯嘅占舒利。尼斯今季喺法甲彈起，占舒利都功不可沒，佢派牌好叻，識得用腦踢波，今季喺法甲交出八次助攻，暫時係成個聯賽嘅助攻王。至於杜古尼就偏重防守，係嗰種中場絞肉機，佢今季喺梅斯場均3.4次搶截，排法甲前10名，另外場均兩次截到對手傳球。呢幾個新一代科特迪瓦中場都好有潛質，等緊豪門招手。
講到科特迪瓦中場嘅必然正選，就係32歲嘅隊長沙利戴爾（右）。小弟好記得戴爾，因為佢個名嘅意思幾不祥，叫「Die」。喺今屆「大象」大軍嘅中場中入面就以戴爾經驗最豐富，希望佢可以帶住呢班有潛質嘅後生仔順利過渡。
文：咖喱