呢個星期嘅國際足球大新聞，除咗C朗拎到世界足球先生，仲有國際足協落實擴充世界盃決賽名單，雖然改革喺2026年先開始，不過由32隊擴充到48隊就真係驚人，𠵱家仲未知道細節，不過南美洲點都加多一、兩隊啩，𠵱家10隊角逐外圍賽已經有4.5個席，再增加的話，巴西、阿根廷呢啲強隊外圍賽真係再Hea踢啲都得。
講真國際足協咁做，明顯唔想強隊入唔到決賽周，影響收視、贊助之餘，對中國呢啲又有錢，足運又唔係特別好嘅國家，就更加係喜訊。
決賽周席位未「量化寬鬆」前，踢到歐國盃、世界盃決賽周，真係畢生榮譽㗎，亦都令唔少球員選擇轉國籍。以近期非國盃為例，水晶宮前鋒韋費特沙夏就決定放棄英格蘭籍，轉為出生地科特迪瓦，友賽地標戰對瑞典更交出助攻㖭。其實英格蘭失去沙夏都真係幾可惜，佢係英格蘭可以邊緣引球突破嘅翼鋒，21歲仔已經加盟曼聯，原本都有好前途，不過唔知係唔係真係媾咗當時曼聯領隊莫耶斯嘅千金，結果大部份時間被棄用兼外借，2015年終於返水晶宮。
正所謂塞翁失馬，曼聯唔要佢，英格蘭唔搵佢踢正式比賽，沙夏轉投大象國懷抱就即刻可以出戰非國盃，而且始終科國實力屬非洲一線，如果今次踢得好好睇睇，以佢24歲當打年齡，代表國家隊出戰世界盃外圍賽，最終出戰俄羅斯，條路應該比喺英格蘭等機會易得多。文：牽牛