練馬師何良上周三（4日）於谷草以「火紅人」衛冕一月盃，全晚更佈下強陣。結果「火紅人」衛冕失敗之餘，更跑到左前腿不良於行，加埋馬房整晚一場位置都拎到，何良可謂賠了夫人又折兵。
事隔一個星期，何良今晚快活谷轉擺精兵陣，全晚只出兩駒。結果於第二場四班1000米率先露面的「威先生」，以大熱門身份在郭能胯下後上打破今季齋缽，單Win及組合獨贏A2分別派30及18元正。
「威先生」沿途居中前位置，末段加速輕勝0.75馬位，此駒身價370萬元，與頭場勝出馬「歐洲之星」同樣出自去年本地拍賣會，貴過「歐洲之星」50萬，馬主係年輕靚仔堪稱筍盤的史昊洺，亦係他季內首度贏馬，其母史顏景蓮亦有在場分享喜悅。
史昊洺表示愛駒今場落班有利，近期狀態亦好，加上快活谷1000米首本，因此賽前有一定信心。何良則表示早於季初郭能已索騎「威先生」，非常有誠意，只可惜今仗赢馬後，下仗升上三班郭能未必做到磅，冇得再騎。
「威先生」同時係郭能今季首度與何良合作建功，後者亦憑「威先生」打破馬房一個月頭馬荒，在新一年首傳捷報。賽後何廐剛好贏滿16場頭馬，成為繼霍利時馬房後，近期另一達到續牌指標的畢業馬房。
今場熱門之一「兄弟熊」由柏寶後追第二，搭頭馬「威先生」構成9.8倍啡燈Ｑ，落飛黨進賬約1,000萬。大冷初出馬「必定掂」於巴度胯下得季軍，第四名則係次熱「志友運」，四重彩派近四萬八千元。而潘頓座騎「愛寶」閘前退出，孖寶轉投大熱門「威先生」當中。