雷神莫雷拉有鋪早糊癮，意思係佢好興早段贏馬，尤其係夜賽。這晚快活谷雷神急不及待，直頭一開場第一場五班1650米就贏沈集成馬房「歐洲之星」，雷神再破自己的香港紀錄，連續第31次賽事贏馬唔斷纜，至於「歐洲之星」大熱打開今季勝門，單Win及組合獨贏A1分別派24及16.5元。
雷神同沈集成今場出擊早有先兆，事緣剛周日朝早，前者專誠到場為沈集成操兩駒，其中一駒就係「歐洲之星」，另一則係未有報名的「得利多」。
結果「歐洲之星」首次配雷神出賽，今場沿途居中，末段從外叠長驅直進，贏個多馬位姿態十分輕鬆。此駒出自去年本地拍賣會，身價320萬元，本身累積兩捷都均於谷草，沙田未有頭馬紀錄。
沈集成表示「歐洲之星」在五班有微利，他相信馬兒稍後升上四班仍有作為。沈集成又補充莫雷拉早段成功攝位慳力，發揮出色，否則被頂出大外疊，就難於爭勝，此馬跑1650至1800米均可勝任。
今場原本有機會開出大熱連贏，惟次熱門「超甜橙」放到末段腳軟，臨尾俾半冷門由立法會及行會雙料議員張宇人擁有的「威德將軍」追過，「超甜橙」跌落第三，「威德將軍」則成功入Q得亞軍；第四名為落飛冷馬「哈哈笑」，四重彩派7,620元。