快活谷這晚最旺騎師肯定是愛爾蘭猛將郭能，佢於第五場三班一哩贏出告東尼馬房「加州再豫」，單Win及組合獨贏A2分別派82及26元。告東尼亦告打開2017年勝利之門。
連同第二場贏何良馬房「威先生」及第三場勝出高伯新的「問鼎高峰」，郭能今季首次演帽子戲法，於騎師王掟甩雷神遙遙領先。
四歲馬「加州再豫」身穿「加州」系傳統黃紅色綵衣，已故掌舵人梁挺生當年正係以呢件騎師綵衣揚名本港馬壇。如今由佢個仔梁欽聖薪火相傳，「加州再豫」原本被馬會選為12大超新星之一，本周一突然無故被OUT消失，而新加入的其中一匹超新星，正係「加州」系另一駒「加州議長」。
當馬迷懷疑有關方面當初揀錯「加州再豫」做超新星之際，此駒用行動證明自己身價，這晚沿途前置，直路順勢加速彈甩1.75馬位，贏得清脆利落，馬兒取得今季第二Win，亦是服役第四捷。馬主梁欽聖表示郭能今場留放出色，令此駒跑來放鬆，故能交出進步表現。
今場二至四名順序為「雷公鑿」、「明月光」及「勝利名星」，其中「勝利名星」在跑馬地百萬挑戰盃獲加3分，未能改變排名，最新有29分，仍居積分榜第十位。