唔少香港人當正寵物係仔仔囡囡，工銀亞洲睇中呢點，噚日推出一張「寵物信用卡」，新客戶申請ICBC Xplore Visa Signature卡，就可以有免費寵物旅遊諮詢服務，申請埋銀聯雙幣白金卡仲會有2個月免費寵物追蹤服務㖭。
工銀話，新客戶可以帶同寵物去見寵物旅遊諮詢師，評估寵物性格，解決帶寵物出國時要搞嘅出入境手續等，仲會介紹酒店、航空公司同景點等。
但其實喺香港，要帶寵物去旅行一啲都唔易，目前只有美國某啲航線可以帶同寵物上機同坐，其他國家大部份都要以貨物托運形式出遊，冇咗「阿仔、阿囡」喺身邊幾個鐘，真係會擔心死媽咪㗎嘛。
之前又有寵物託運後死亡嘅案例，所以呢個寵物旅遊諮詢優惠係咪吸引呢？真喺見仁見智。