大陸領導人最愛新年流流探訪貧窮戶革命村，弄一張「領導人和群眾在一起」的合照。當然，如果沒有脫離群眾，又何須這麼刻意強調和群眾一起呢？政治作秀，姑妄看之。
這股風氣不知何時吹到香港，上屆梁唐之爭的特首小圈子選舉，唐唐瞓劏房，那張惡搞的「英年早逝」相片可謂公關災難的經典。
想不到今屆選戰案件重演，政治人物瞓開有癮，葉劉和胡官應邀參觀劏房，又來「瞓身」體驗，於是網民得到一張被喻為「P圖都慳番」的天然神相，胡官企喺度望住瞓喺度嘅葉劉，真係無限遐想。
先從技術層面出發，係咪一定要瞓低呢？上屆唐梁之爭，689CY去了探劏房籠屋﹐但他沒有瞓低，免去惡搞的潛力圖。他反而和居民坐在床上，近距離傾偈，贏盡公關。
畢竟真要了解民間疾苦，一張示範單位仲要無木蝨的乾淨座鋪，又豈及一個活生生的棺材房住戶，更能說明問題？
NBA球星安東尼參加巴西奧運時，隻身走去巴西貧民窟做慈善探訪，人家億億聲身家，也毫不惜身，不會到安全的示範單位遊覽然後嘆一句「真係好辛苦喎」。
從實際層面出發，未喺公廁偷食過，都應該知道喺廁所食鮑魚係臭的；不去瞓棺材房，就不知道今天香港人生活有多艱苦嗎？
胡官前半生是法官，毋須訪貧問苦，尚可接受；葉劉經常強調自己是唯一受選舉洗禮的參選人，多年的議員生涯，竟然都未接觸過貧苦大眾嗎？果然選舉令人謙卑，期間限定供應。
最重要的是，唐梁都探過劏房戶，五年後大家仍然在探，證明劏房不會因政客的探訪而消失。
關注過後，問題依舊，香港的窮人繼續成為權貴參觀的景點。那不如探訪香港站的故宮牆，面聖表心跡。反正都係想打咭矣。