已經辭職嘅薯片叔叔仲未獲中央開綠燈批准辭職去馬選特首，一眾薯片叔叔嘅支持者，相信都越等越心急，但相信等之餘，仲有好多嘢可以做嘅，好似講過撐財政司司長曾俊華出戰嘅自由黨榮譽主席田北俊咁吖，最近就喺商台開咪主持《田式生活》，訪問政商界人士，而節目播出前一日，仲係田少嘅70歲生日；田太仲賣大包，喺生日晚宴大晒唔同年代嘅田少look，一齊慶生想當年！
文青look好老正
1月8日星期日係田少嘅70大壽，佢至今都仲keep到咁fit，又繼續型爆滑雪，應該令好多男士艷羨！據知喺生日晚宴上，一向細心嘅田太，仲好窩心咁送上surprise，就係將田少嘅舊相公諸於世，同大家一齊「品嚐」田少。
睇番啲相，真係唔同年代都有㗎，例如坐喺BB凳嘅田BB，眼仔睩睩極度精靈。去到少年時代嘅文青look，最突出嘅可能係梳到好老正嘅頭髮、以及粗黑框眼鏡。睇番當年同今日，其實田少個樣都變化唔大㗎。最爆係連甜蜜蜜結婚照，田太都同大家分享，果然唔只趁田少生日食大包，而係好大方咁賣大包。
以為咁就完？點只吖，田太仲攞咗張那些年立法局年代嘅自由黨議員珍貴合照，當中包括創黨主席李鵬飛及盛傳加入林鄭競選辦嘅夏佳理。Those were the good old days，唔知會唔會令人有啲欷歔？
李八方
mailto:[email protected]