一向心直口快嘅新民黨主席葉劉淑儀，宣佈參選特首之後竟然話問過會計師公會，引述公會稱該界別選委，連公會都冇人識佢哋，暗示對方非精英。點知公會澄清冇收過葉劉查詢，而佢嘅競選辦都認事前冇直接查詢過選委資料，而葉劉呢番話已經辣㷫一眾會計界選委。但八方聽聞，佢最近主動約見會計界選委，對方仲應承會面，唔通想「破冰」﹖
會計界選委譚香文同八方講，葉劉陣營主動約見佢哋「誠、會計師團隊」，連同該界別獨立選委陳耿廸等5人會面。
譚香文都話，知道葉劉嘅政綱同佢哋理念南轅北轍，但作為選委，有責任接觸所有候選人，所以之後曾俊華、林鄭月娥若然參選並約見，佢哋都一樣會見喎！