周日英足盃第三圈熱刺主場對今季降至英冠嘅阿士東維拉，睇牌面已經冇得打，如果睇埋球證安排，見到甸恩呢個大名，熱刺球迷就梗係放心晒，結果熱刺順利由甸恩帶領，呀唔係，普捷天奴帶領下，由賓戴維斯同孫興民建功，以2:0擊敗維拉晉級。
錯漏百出照有得吹
甸恩同熱刺係咩關係？唔使我求大俠介紹，大家去youtube打上hotspur同dean自然搵到。甸恩上次執法英超韋斯咸對曼聯瀨大鑊，誤判主隊中場菲侯利紅牌出場，最後亦都幫菲侯利上訴成功打甩紅牌㖭。不過英格蘭球證界一向畀人感覺官官相衞，甸恩又點會被處分呢，周日仲安排一場熱刺對維拉畀佢主吹。不過平心而論，甸恩呢場波就冇咩大錯誤，熱刺晉級都算實至名歸。不過熱刺大軍就少咗個人，就係近期當旺嘅前鋒哈利卡尼，原來佢周日陪女友Kate Goodland生女而缺陣，卡尼亦順利添咗個7.8磅囡囡。
周日其他戰果都算正路，車路士大勝彼德堡4:1晉級，不過隊長泰利領紅牌出場，車仔領隊干地話要幫佢上訴喎。