中環九如坊一幢唐樓天台，前晚有一個披頭散髮嘅女仔，着住一條藍色連身裙，危坐喺天台，隻手好似係流緊血咁，一滴一滴咁，突然嗰個女子一躍而下……。原來正係拍緊導演邱禮濤嘅鬼片《常在你左右》，前晚場戲講雨僑割脈加跳樓雙料自殺，話佢由天台飛落嚟，死咗之後，去附近公園公廁嚇死啲途人。
「真係好驚」
現場所見，着住藍色睡袍嘅雨僑，赤腳喺天台培養情緒，表情十足，依照幕後指導示範，跟手就跨過天台圍欄危坐喺石壆上面，因為雙腳凌空，都咪話唔驚，雖然背脊仲有威吔，不過雨僑個樣都震晒咁，真係入晒戲，roll機之後，拍完一個鏡頭，佢即刻要九秒九落地，最後NG咗三次，邱禮濤先肯收貨。跳樓嗰部份就由替身代勞，話咁易就完成。
其實雨僑唔係第一次拍跳樓戲，噚日馮仁昭訪問佢時，佢直認拍嗰陣係勁驚：「我好驚，我真係好驚，因為呢場戲好重要，所以好多detail位，我又笨手笨腳唔識點落地，搞到擦損晒！其實我嘅死係成個故事嘅開始。」
撰文：馮仁昭