苗禮德剛周日沙田賽事，靠女將蔣嘉琦操刀的「好愉快」增添進賬後，今期（11日）快活谷夜馬，苗禮德亦將倚重90後年輕騎師出擊，不過就不是蔣嘉琦，而係全力撐史卓豐。
事關今期苗禮德5匹戰馬中，除了「鋒芒畢露」用雷神，其餘4駒「威德將軍」、「珍珠有利」、「事勝意」及「金滿載」全配史卓豐，呢位小鮮肉騎師，堪稱成為苗廐影子主帥。而今日周一排位朝，兩人亦有搏殺手影，約定一齊喺機坪附近睇馬，又傾個不停，明顯正在研究周三出擊計劃。
苗禮德、史卓豐4匹合作馬中，3隻上仗跑入前5名，其中第四場四班1650米的「事勝意」上仗同程輕勝，走勢有餘未盡，馬兒今季3戰1冠2亞大熟大勇，今仗留在四班再爭勝途，仲要抽到1檔，形勢大好。睇嚟苗禮德、史卓豐有力繼上月「世界紀錄」後，再一次合作贏馬。