西九興建香港故宮文化博物館（以下稱西九故宮）一事，卒之要搞到有市民申請司法覆核，西九管理局唔嫁又嫁，事前無諮詢，見事情搞大咗，又在星期四（1月5日）宣佈由1月9日開始，展開6個星期公眾諮詢，收集市民對西九故宮設計、營運、展覽、教育嘅意見。林鄭呢位好打得之人，大概受批評得厲害，唯有轉軚搞諮詢，以息民憤，但在立法會點都唔肯認轉軚補鑊。乜唔係吖，連前議員、工聯會大將陳婉嫻都在電台批評「有些人將好事變壞事、不搞諮詢不合今天香港民情」，文化界立法會議員馬逢國上now TV答問題，一味話唔知，要林鄭司長自己回答，可見得建制派及大部份有關官員事先都蒙在鼓裏，但又要為林鄭護航，做建制派人物，心理要有特殊構造。
中華廠商會聯合會會長李秀恒係近20年冒起嘅收藏家，所藏明代傢俬，時價億億聲，撲出嚟為西九故宮護航，組織一個撐西九故宮大聯盟，堅稱西九故宮係明益香港，直情係寶，全力支持。其實李先生有啲唔對口形，大部份市民唔係反對香港有「故宮博物館」，左丁山其實都好贊成、支持，但問題焦點是The means（手法，方法）有問題，我地贊同the ends（目的，目標），但不能監粗嚟，以為目標正確，就可以手法粗暴（例如打劫銀行去濟貧救災），為求目的，不擇手段。梁特林鄭之為西九故宮拍板手法，明顯係黑箱作業，有為長官的意志，令港人不安，誠恐先例一開，以後其他事情都特事特辦。廉政公署之反貪程序、反貪守則及公共項目之招標大原則，其實未必有利效率之提升及降低成本嘅，反而增加使費㖭，香港點解要如此，犧牲速度，重視程序？係為咗增進廉潔程度及阻止貪腐而已。香港資深公務員嘅座右銘永遠係「程序為本，達標為次」嘅啦。林鄭等人為了快捷就秘密行事，西九建故宮不招標，即時委任嚴迅奇為建築師設計建築物，嚴格嚟講，係違反廉署守則，即使不涉及公帑，由馬會捐獻，但不可不知，馬會自己推行嘅大項目，亦係經過招標程序嘅。呢啲唔講嘞，講番1月9日開始嘅公眾諮詢，睇落西九管理局（難為董事諸公要為林鄭主席死頂）又會自己打自己。諮詢公眾及持份者對西九故宮的設計和營運方面意見喎，唔係已經委托咗大師級人物嚴迅奇做設計嘅呢咩，做乜又要公眾俾設計意見，劉國松落筆畫水墨畫之前，駛唔駛諮詢公眾意見呀？假使公眾對設計之品味與大方向，與嚴大師不同，嚴大師怎麼辦，聽我地意見還是堅持佢嘅大師級美學專業原則？西九管理局如此進退失據，勢將陷嚴大師於不義，最終會攪到一鑊泡！