舊年底政府第N次出辣招，搞到發展商一個二個嗌救命，輪住呻好難賣樓，不過，長實（1113）「樓神」趙國雄噚日就牙擦擦咁話，已經度到條「天下第一好橋」賣樓，遲吓會畀個驚喜大家。
事緣噚日講起發展商之間競爭好大，樓神就覺得家陣賣樓唔淨止鬥價錢高定低，反而點樣用合適嘅付款辦法、配套同刺激方案（incentive）去吸引買家入市先係發展商主要嘅戰場。
然後轉個頭，佢就沾沾自喜咁話：「其實我都好心急想講，我哋都諗到啲天下第一好橋，不過未拎到預售樓花同意書就唔講得住」，之後佢同事又形容做法係「石破天驚」。
睇番往績，樓神嘅賣樓橋都唔係鋪鋪掂。好似舊年底，辣稅推高到15%之後，長實好快就出手應對，旗下其中一個豪宅盤推出代繳晒15%印花稅，做到買家1蚊印花稅都唔使畀，但都係谷唔起銷情。近年相對成功嘅，就要數2015年初，金管局收緊樓按，樓神推出最高九成樓按，紅磡樓盤成功大賣。
咁樓神呢次講到係「天下第一好橋」，惟有講句：好期待囉。