美國有《Sex and the City》的Samantha（Kim Cattrall飾演），香港有《幕後玩家》的黃宗澤、蕭正楠和張繼聰，甚至各大夜店的「PR 」，多得諸位，Mary和行家們水洗不清……咦？乜你哋唔係晚晚踩住高跟鞋去party 、飯局咩？
第一，公關趕死線起來不會比記者輕鬆，為求在辦公室、活動場地小跑起來安全一點點，不穿高跟鞋久矣。
第二，party就多謝喇，連睡眠時間都唔夠，蒲乜吖；飯局呢家嘢，我都好想同各界友好保持良好關係，收吓風、放吓風咁，但冇事冇幹都經常砌到8、9點（你不是不知記者通常幾點問問題吧），唔通次次叫人食住先，自己食甜品先到咩！
就嚟又農曆新年喇，會唔會仲有啲無聊親戚係咁問你阿媽阿女做邊行，而你又點幫阿媽解圍呢？阿媽唔會同班師奶講，公關係好策略性嘅過程，透過呢個過程，機構同佢嘅持份者，建立良好互動的關係啩？
咁不如試吓咁理解：
一、電視新聞見到張建宗又星期日出嚟講嘢，佢可以話，阿女咪幫公司啲高層度吓幾時公開講嘢、幾時唔講，又寫定晒啲重點畀高層講囉。
二、見到芷菁十郎做《與CEO進餐》，又可以教精啲牌腳：嗱，阿女會幫老細安排上十郎個節目㗎。
三、睇到主播讀出某公司發言人對事件的回應，佢又可以扮專家：阿女最叻寫呢啲「阿媽係女人」式回應㗎，正衰女！
四、見到財爺facebook又出selfie，阿媽又可以懶醒話：唓，邊得來咁多偶遇，阿女行家安排㗎！
不過點都好，伯母千祈千祈要清楚，我們不是黃宗澤呀，邊有人哋咁爽呀！
彭瑪莉
mailto:[email protected]