近排潘蘇通旗下高銀系動作多多，好似舊年12月爆冷攞咗何文田港鐵（066）項目，噚日高銀金融（530）再公佈，搵嚟有「獨董王」之稱嘅立法會議員石禮謙做獨董。
石禮謙與潘蘇通好似大欖都扯唔埋，但其實有迹可尋。好似舊年11月九龍灣高銀金融國際中心正式啟用，石議員就有份參加開幕儀式，石議員當時只同潘蘇通隔住另一個立法會議員林健鋒。石議員喺高銀金融做獨董，每年酬金24萬元。
高銀順便列出呢位「獨董王」有幾忙，佢另外做緊17間上市公司嘅獨董，包括港鐵、莊士中國（298）、德祥地產（199）等等，下次見到佢真係要請教佢如何分身。