有同事返到公司成隻喪屍咁，以前啲同事會問：「你噚晚做賊嚟？」𠵱家啲人會問：「噚晚搶平機票？」
先唔理嗰啲所謂budget airline啲機穩唔穩陣，次次一有平機票搶就死server，你都咪話唔多人搶。講真，去個日本台灣泰國都係坐幾粒鐘，service質素唔同又如何？嗰幾個鐘，瞓都瞓咗去啦。所以家姐我第一日都講，個個都去開張儲miles機票，碌得卡嚟換miles呀，人哋廉航都飛咗幾轉喇。
不過既然買咗廉航機票，即係酒店要自己諗啦。上次介紹過有信用卡可以儲分免費換酒店，咁萬一未儲夠又或者唔夠分呢？就要自己上酒店網喇。
講到啲儲miles信用卡優惠咁離地，咁乜嘢優惠先貼地？梗係最實際：講錢啦！家姐有個banker朋友就係做信用卡，佢上年年尾條數做得勁好，間間銀行啲信用卡spending年尾得嗰幾個% growth或者無增長，佢哋開始優惠嗰個月飆咗成雙位數growth，咪就係識做呢啲貼地優惠囉。
例如去開自由行又精打細算嘅人一定聽過嘅Hotels.com同Expedia呢啲訂酒店網，佢哋就直接做折頭，完全唔使儲分呀、登記呀咁。以Expedia為例，用任何一張大新信用卡可以攞到最多半價嘅promo code；去Hotels.com都有88折。簡單五日四夜去個東京，可以平到千幾二千蚊㗎喇。Uncle、Auntie輩唔識買機票酒店？張卡喺Travel Agency都有折，死未！
連之前有介紹過嘅外國網購佢地都做埋，除咗外幣簽賬夠一定金額會有現金回贈之外（又係直接送錢！），仲定期有e-newsletter提啲客邊度網購最抵，同埋網上購物有啲咩安全tips咁，提你買得抵之餘仲畀埋回贈，好過一味sell miles啦。
【家姐教路】訂酒店，三個字，但係有好多方法，同一間房可以好平，又可以好貴。以日本為例，如果唔係用信用卡積分換酒店，基本上我會睇三個地方：
第一，訂酒店網：即係最普通如上面提過Hotels.com呀Expedia果啲，好在可以睇到間房好多相，同埋喺地圖搵，邊間酒店最近車站、最就腳，一目了然。搵到心水？千祈唔好訂住！因為……
第二，價格比較網：相信大家都畀廣告洗腦唔少，Hotelscombined呀Trivago呢啲比較網，個網本身係無房訂嘅。但佢會列晒唔同網站同一間房嘅價錢，家姐我試過多手一search，最後去咗一個名不經傳嘅酒店網，用咗平25%嘅價錢嚟訂同一間房，勁開心。當然有啲網伏味好重嘅，就自己衡量吓啦。不過搵到平房，最後一步都要去……
第三，酒店自己公司網頁：話晒訂酒店嘅網頁都係agent，agent就一定有佣。話唔定上返間酒店原本個網係最抵。
關家姐
http://fb.com/kwangajei