消費者委員會為慶祝成立40周年，舊年搞咗個《4×10漫畫展》，請嚟10位代表唔同世代嘅本地漫畫家嚟個crossover，包括啱啱過身嘅「老王澤」王家禧筆下嘅《老夫子》，帶出唔同嘅消費議題，吸引成8萬人參觀。消委會又將作品加埋參觀者嘅文字回應，結集成一本紀念集，欣賞精美畫作之餘，亦有反思同得着。
紀念集收錄咗4幅《老夫子》作品，取自王家禧1965至1968年創作，今時今日睇番一啲都唔過時。其中〈烏龍設計〉講老夫子幫人起花園洋房，點知大門一打開就係廁所，同𠵱家嘅劏房盤不謀而合，難怪有參觀人士話今日要重新起題嘅話，只能用「耐人尋味」形容。
除咗老夫子，紀念集仲有李惠珍嘅《13點》、小克嘅《聾貓》等，117頁彩色印刷，絕對值得珍藏，可惜呢本係非賣品，可以欣賞嘅人唔多。