巴塞喺2017仲未得。巴塞隆拿歇冬後先喺西盃輸波，到周日西甲聯賽作客「黃色潛艇」維拉利爾繼續贏唔到，靠美斯喺90分鐘主射罰球扳平1:1，雖然唔使輸波但已經俾榜首皇家馬德里甩開五分。不過巴塞今年兩戰不勝都係有黑仔成分，今場維拉利爾有球員喺禁區飛身用手擋波，球證企得近都冇吹12碼，難怪守將碧基又萬梓良上身，怒插喺球場包廂睇波嘅西甲賽會主席迪巴斯（Javier Tebas）。
「禁區犯手球唔吹12碼」
今場波嘅執法球證伊基斯亞斯（Ignacio Iglesias），今季首次執法巴塞賽事，而佢最近一次吹巴塞波，就係上年四月皇家蘇斯達主場1:0贏波嘅西甲比賽。巴塞喺上周四西盃16強首回合輸畀畢爾包，球證有兩次爭議性冇吹12碼畀巴塞。到周日作客維拉利爾，踢到72分鐘，當時巴塞仍然落後緊0:1，中場般奴蘇利安奴試圖攔截尼馬傳中嘅時候撻落地，之後明顯有犯手球，不過伊基斯亞斯冇示意，激死成班巴塞兵。巴塞最後都叫執番一分走，完場前美斯喺禁區頂被森姆卡斯迪利祖侵犯，罰球由美斯親自操刀死角入網，1:1和局收場。
巴塞中堅碧基一向口沒遮攔，佢喺輸畀畢爾包賽後已經因為公開批評球證，要接受紀律委員會調查，隨時要被罰停賽。到今場碧基又再逼害症病發，賽後走到場邊向觀眾席包廂怒吼，指住坐喺裏面嘅西甲賽會主席迪巴斯大鬧：「你睇唔睇到呀？係呀，係叫你呀！」迪巴斯之前公開承認自己係皇馬球迷，所以一直以嚟同巴塞嘅關係都麻麻哋。事後冷靜番嘅碧基再講手球事件：「好明顯般奴兩隻手都犯手球，雖然之後馬斯真蘭奴同樣喺禁區出現手球（一樣冇判12碼），但我哋要睇係咪蓄意。今日球證吹成點大家有眼睇，唔使我再多講。」
逼和黃潛 少皇馬五分
巴塞失分已成定局，今輪聯賽失兩分後，俾少踢一場嘅榜首皇馬拉開到五分距離，連次席位置都俾西維爾搶咗。對於爭標形勢，教練安歷基已經灰晒：「巴塞可唔可以蟬聯今屆聯賽冠軍，主動權已經唔喺我哋自己度。雖然數字上仲有得爭，但要睇皇馬面色做人。至於球證吹成點我冇意見，吹唔吹罰唔係由我去決定。」