八方相當年：
做童工湊細妹　胡志偉夠生性 - 李八方

白鴿黨新任主席、九東立法會議員胡志偉作風一向踏實，原來佢細個已經相當生性，因為家境清貧，喺獅子山木屋區住咗近10年，細個成日去獅子山公園執風箏，平時除咗要接送細佢年半嘅妹妹返學，小學同中學時期仲要幫做毛織廠嘅父母做「童工」，用手推車將啲製成品運去新蒲崗工廠區㖭呀。

懷100美金赴美升學

54歲嘅志偉好多往事分享，但相就冇乜，佢話因為屋企冇乜錢，所以細個唔多影相，搵張兒時相都好難。就讀皇仁中學嘅佢會考成績一般，攞2C4D，令佢一度以為冇機會繼續讀書，所以1981年中五畢業後做過廚師，後來喺餐廳經理鼓勵下去咗澳門大學讀副學士、再銜接到美國升讀大學。
佢喺1987年留學美國威斯康辛大學，主修經濟，副修數學。佢當年全身只得100蚊美金就隻身去美國，到埗後睇見一餐麥當勞都要3個幾美金好徬徨，後來喺大學搵到工，每月賺到200幾美金，個人先至定番落嚟！由於大學成績好，佢仲獲聘為大學助教。
志偉1991年完成碩士課程後返港，幫民主黨時任區議員林鉅成做助理，之後開始參加市政局、區議會同立法會選舉；90年代選舉期間識咗幫另一候選人做義工嘅靚女、即係家陣嘅胡太，兩人結婚至今21年，仲有個就嚟廿歲嘅囝囝。