【三個粉絲追韓劇】「煮個麵你食」唔係大台專利，其實好多韓劇都有呢個情節，因為即食麵對韓國人嚟講非常重要！
三個粉絲去首爾站一間超市直擊，訪問韓國人，問佢哋有幾愛即食麵，有人話至少每星期食一次，最多嘅誇張到日日都食，話係佢哋嘅零食！韓國人Yu Jin仲話即食麵有治療心靈嘅作用，稱為「comfort food」。Yu Jin話以前喺印度讀書讀咗6年，每次病或者掛住屋企就會食即食麵，可以令佢開心返，感覺好似返咗屋企咁。
韓國人肚餓時，當即食麵係小食，喺寂寞時當藥食，不過各位絲打咪亂咁食！《太陽的後裔》第十三集，宋仲基送飲醉酒嘅喬妹返屋企，諗住幫喬妹除鞋，點知喬妹以為自己喺人哋屋企，唔願意除鞋，仲講咗句：「我唔係隨便喺人哋屋企食即食麵嘅女人。」原來即食麵因為方便，隨時都食得，韓國人就用即食麵比喻某啲人「隨便」。如果絲打們遇上韓男同你講，「不如上你屋企煮個麵食吖！」咁就要小心喇，佢可能另有企圖！
喺超市買即食麵嘅人，除咗韓國人，仲有好多嚟自世界各地嘅遊客。點解千里迢迢飛韓國買即食麵呢？無論香港人、澳門人同台灣人都話，「平啲！」台灣人李佳瑩仲笑住話，「帶得回去都盡量帶！」除咗平，亦因為韓國即食麵多款色，有位日本女士就話會買部隊鍋麵，泰國女生May就話鍾意食辣，所以會買黑色包裝嘅超辣麵，至於香港人Sumky就話有朋友介紹佢，買一款「真係有蛋」嘅麵。動主播阿仙就買咗Sumky介紹嘅即食麵返民宿煮，的確內附一包蛋餅，但煮出嚟幾乎溶晒，只搵到蛋碎！
即食麵對韓國人嚟講咁重要，佢哋對點煮法、點食法都好有研究。韓國人Hong Jun就話鍾意落啲大醬調味，泰國人May話佢睇韓劇見韓國人會加蛋，所以佢都會落蛋，港人Sumky就話會學佢哋加塊芝士。韓國人Yu Jin仲教路話，「最近興將兩種唔同味嘅麵混埋一齊食！」即係一次煮兩個麵，例如一包炸醬麵同一包超辣麵，一齊煮就變咗「炸醬超辣麵」！究竟係咩味呢？即刻睇片！
主持：動主播阿仙
記者及繙譯：卓惠媛(Joyce)
攝影：陳家文、李錦鏵
以上韓劇片段由Viu提供：
https://goo.gl/Kyr3E6
【三個粉絲追韓劇】
http://hk.apple.nextmedia.com/enews/animation/kfans/