有時得到未必比失去好，八方講緊嘅係特首寶座。上屆特首戰，賽前熱門唐英年大熱倒灶，俾梁振英後來居上衝埋閘，但睇番梁特呢幾年萬箭穿心、家無寧日、民望急挫，就知道唐唐可謂塞翁失馬、焉知非福。唐唐接受自由黨榮譽主席田北俊、即係ABC大將主持嘅商台節目訪問時講到，輸咗選舉係有失望，但心態相當好，可惜梁特似乎政不通、人不和，但佢強調唔係幸災樂禍！
卸任立法會議員嘅田少，除咗多咗同啲孫見面，亦喺商台開咪主持新節目《田式生活》，頭炮嘉賓係唐唐。唐唐話2012年特首選舉落敗後，唔少人安慰佢塞翁失馬、焉知非福，佢坦言失望，但心理狀態相當好，當時祝願當選嘅梁振英政通人和，點知對方就政不通、人不和，社會和諧仲惡化咗。
同家人關係更融洽
講完呢番說話，唐唐唔知係咪驚被誤會呢，主動話「我唔係幸災樂禍」，強調係覺得相當失望，因為如果梁特真係做到政通人和，就係港人嘅福祉。但失望之際，佢話冇特別療傷，「都係開咗支靚酒，同家人嘆吓支靚酒，剝啲花生，睇吓新嘅行政長官點樣對付同泛民嘅敵我矛盾」，繼而又話敗選後同家人關係更團結融洽，又重新打理10年冇掂過嘅家族生意，仲發現好朋友唔係因為佢係政務司司長或其他身份先同佢交心，係真正嘅朋友，講到收穫良多，似乎梁特要羨慕佢至真噃！
而啱啱70歲生日嘅田少就借勢向唐唐求教，點樣可以過豐足嘅退休生活？唐唐笑稱田少年紀比佢大，唔敢賜教，但可以畀忠告，就係唔好食咁多花生，因為食得多熱氣。
李八方
mailto:[email protected]