每個人都有自己想行嘅路，2011年港姐季軍兼最上鏡小姐許亦妮，雖然同大台仍然有約，但早前透露因私人理由，不再活躍娛圈，想幫屋企人打理生意。
減少幕前演出，但許亦妮仍樂於更新IG，前日開始貼「半素顏」自拍照，直至昨早一連發6張相，張張都係佢嘅「招牌」晒極V煞面。
唔少網民都話佢變臉，昨日許亦妮終於回覆傳媒，親解「P到塊臉冇咗一忽」之謎﹕「其實個樣冇咩唔同啊，我自己覺得可能係髮型唔同咗，有瀏海所以望落去年輕啲，而且越嚟越知道自己影相咩角度好睇、瘦啲，咁可能大家覺得我唔同咗樣啩。」
睇番許亦妮今年1月1日影嘅相，國字臉仍在，咁係咪P圖P到過咗火？佢話﹕「其實我不嬲都係面形比較方，如果大家留心D睇我嘅面形，某一啲角度，我仍然都系國字口面。有瀏海真係可以拉長少少塊面㗎，影相個角度高炒少少，平時真係冇乜點P相，可能執下啲顏色咁咋。」